تعديل مسار العمر
خط ماشي ف مبتداه
جناين راويها العشق
ولسه مفرعتش
جوة زنازين الحياه.. قلوب بترفض تلتقي
كان العتب نهر سايل ع الضلوع
لما ولعت الشموع
إنطفي ضي الأماكن ف مهدها
سعيت أبروز الأحداث…
تساعدني الأماني بالأمل
كان ردها ..
إكسر سكاتك ياجبل.
صعب الكلام ..
يوصف معاني تحسها
خطوط عرضك ف الحياه
إحسب تفاصيل جوها
تلقي نتيجة عمرك
يشبه البرد ف يناير
جوك مغاير
لكل تفاصيل السنة
تلبس تقيل….تمشي ضرير
هو المصير
لحظة خروج الأه من بوح الصور
قد تعتبر….قد تعتذر
إنك عديم الروح
ف حس المعطيات
ترفض تبوح….تخرج أهات
يكبر معاك إحساس الذنب للسما
مش مظلمة
المعضلة.. إنك تسيب أوهامك
تسحب خيوط حلمك .. تفرطه
فتلملمه…يصبح. ف ايدك. لعبكه
هي الحياه .. معادلة قابلة للزوال
مابين حرام وبين حلال
تايهة العقول .. ف المنتصف
بس أعترف
إن الجميل .. ف وصفها
إن كل شيء متاح
ف البراح.. ألقي السماح
جوة الزقق جراب ماليه الهمهه
تعديل مسار
لما القرار .. ينبع من ذات حضرتك
تطرح همومك م الوجع
تقسم سكاتك ع المشاع
تساوي فرحك ع الورق
تجمع شتاتك ويا اللي باع
تبقي النتيجة مقلمة
تفرد حنينك ف الشمال
تأخد بإيدك لليمين
ترفع دراعك للسما
تكتب ف صفحة…الألم
تعديل مسار
تضرب عيار
ع اللي كتف ضحكتك
كان الوجع .. لما إحتضر
نداه حنين الذكريات
يدفن معاه أصعب قرار
غمة وأهات .. حلو السكات
لما تحس الإنتصار
تفرد ضلوعك للهوا
ترسم بريشتك. ع النجوم
ضي القمر
صعب إنه يختفي
فا تحتفي .. إنك صبور
تصبر تنول .. تقدر تقول
ضلمه .. ونور
هتعيش .. وانت منتشي
ــ