بزرميط ..
الدنيا آخر بزرميط
وتفكره راجل تمام
يطلع على ضهره غبيط
يقول وتسمع له تمام
فارس تمام شهم وهمام
كلامه سيف عنتر مخيف
والفعل يطلع مش تمام
ويعادي ده ويحابي ده ..
وتفكره بيحب ده
أتاريه ولد فركوك حويط
ياخد ما يدي ده وده
الدنيا فيها كتير قوي
من صنف هذا المفتري
يعدي بيك عرض المحيط
ويرجعك عطشان قوي
ملعون أبو أم المصالح
لخبطت صالح في طالح
شوهت وش الجمال ..
دوقنا منها الحلو مالح
ونصيحه خدها حرز ليك
أوعي الحمار يضحك عليك
يتخفي في هدوم الأسد
كتكوت ضعيف وتظنه ديك
حبة عيال ملهاش أصول
بتصول في عك وفيه تجول
طمعانه تبقى في يوم نجوم
هأهأ لا ..هيهات محال ..
يا ام الخلول ..!!
شوف بقى مفيش حمار
يضحك عليك ا!
وتمد له في زمان إديك
ظنك هايبقى في يوم حصان ..!!
الوكسه تبقى فيك وليك
وهتبقى زيُّه مسخره ..
محتاج على ضهرك غبيط
العرق دساس في الغويط
والخسه دساسه ف حويط
والأصل عمره ما ينقطع
فيه الذكي وفيه العبيط
الدنيا آخر بزرميط
شعر :نبيل مصيلحي
ـــ