بقلم خالد سعد
وحشني الضحك والفرحة
شوفولي حد يرجعهم ولو تنقيط
ولو عايز تمن ليهم
راح ادفعله ولو تقسيط
ما هي نقطه تجيب نقطه
هبات مبسوط
يا فرحه اتحركي بالله
يادمعة قلبي بيرتاحلك
وكنت كتير بفضفضلك
لكن بلاش تقليب في الماضي
كلامنا فيه علي الفاضي
لا هيغير ولا يبدل
كفايا حزن شوفيلي حل من فضلك
تعبت كتير من مشيي بجنب الحيط
سنين عمري اتسرسبت مني ككر الخيط
وطول العمر من نقره لدحديره استويت تخبيط
يا دكان الأمل فينك
قالولي عندك الأحلام
سألت بكام
فقالوا الناس كده ببلاش
لكن دور علي حبك متستناش
سألت كتير
وشكل الحب راح ولا جاش
وانا راجع لمحت صبيه متعايقه
ومبسوطه قوي وفايقه
فقلت ياحلوه فين الدكان
قالتلي هتشتري ايه
قلت الحب
لقيت ضحكايه مرسومه
وجاوبتني اوام
دا ارخص عندي م الدكان
لقيت قلبي كده مرتاح
قالتلي تعالى اتفضل
طريقي آمان
معاك تاخد ولو معذور راح تبدل
هبعلك ضحكتي صافيه
وحلم جميل واخد منك الأحزان
لكن ليا انا شروطي
ترافقني اللي جاي كله
وتبقالي صدي صوتي
وتبقى لساني في سكوتي
وليك مني اكون لك ضحكه ما تغبشي ليوم موتي
يا فرج الله
نهاية دمعتي فرحه
وموت للأه
وحلمي خلاص لقيته وياه
ياعم يا تاجر الضحكه خلاص روح
وانا هدخل هنا اصلي ركعتين لله