حوار – حسناء منصور
ألتقى موقع وجريدة عيون الشرقية الآن مع الطالبة “شهد مجدي” الرابعة مقرر على أوائل الثانوية العامة على مستوى الجمهورية علمي علوم داخل محافظة الشرقية.
* وأنتي داخلة تالتة ثانوي كنتي متخيلاها إزاي ؟
** أن هي صعبة أكيد وكنت أعرف إنها صعبة بس كنت بقول إنها أن شاء الله هتكون سهلة زي أي سنة وأحاول أذاكر بس كويس عادي ماكنتش عايزة أخوف نفسي أوووي كنت متحمسة أكتر بصراحة.
* و أول ما بدأتي دراسة كان أيه إحساسك؟
** الأول كنت بقلق، بشوفها أن هي يعني أن شاء الله ممكن أن أنا أحقق منها حاجة ف اللي ماكنتش معترضة لا كنت متحمسة.
* وهل هي فعلاً طلعت زي ما انتي كنتي متخيلاها كده؟
** لا الصراحة يعني هي في الأول كانت كويسة عادي اللي هو هروح الدروس وبعد كدا هذاكر وأنت كدا كدا لو شاطر ف أنت بتذاكر اللي عليك أول بأول زي أي سنة بس لا بقا بتيجي في وقت كدا بتكون عايز مجهود أكبر بكتير من أي سنة وبتكون مختلفة في الآخر لكن في الأول تمام.
* أي التحديات اللي هي ممكن تكون واجهتك فيها ؟
** كله، يعني مثلاً الدروس اللي هو بقا ممكن تتبهدل شوية ممكن ما تفهمش من المدرس كدا في اللي هو أنت بقا تختار كويس بس اللي هو الحمدلله كله مشي كويس.
* تالتة ثانوي كانت بالنسبالك أيه ؟
** كانت بالنسبالي دروس ومذاكرة في البيت عبارة عن كدا، وكنت بخرج عادي، لكن في شهر تلاتة وأربعة اللي هو بتلاقي نفسك أساساً مفيش وقت تخرج اللي هو ما بيجيش سيرة الخروج أساساً علي بالك لكن في الأول بتكون عادي زي أي سنة بجد.
* حياتك كانت عاملة إزاي خلال رحلة الثانوية العامة ؟
** ماكنتش كلها مذاكرة، كان اه فيه سوشيال ميديا عادي حتي أيام الامتحانات كنت بفتح عادي الاكونت بتاعي شغال أيام الأمتحانات وكلنا كنا كدا أنا وصحابي وجابوا مجاميع برضوا أنا شايفة بقا أن ماتفضلش تخنق نفسك اوووي عشان أنا شايفة أن الخنقة الزيادة دي بتيجي في الآخر وبتكون زهقت ف أنت تكون موازن يعني برضوا مش سايبها أوي بس عامل اللي عليك بس برضوا تحاول ترفه عن نفسك كدا كدا هتلاقى وقت يعني أنت لو منظم وقتك كويس هتعرف توازن مابين دروس ما بين مذاكرة بين حتي أن أنت تقعد تتفرج علي التليفزيون بين كل حاجة.
* هل كان في توقعاتك أن أنتي تكوني من الأوائل ؟
* * طبعاً لا خالص أنا كنت بدعي قبل ما النتيجة تظهر أن أنا أجيب بس مجموع كويس كانت أقصي طموحي أن أجيب 94٪ مثلاً دا أقصي طموحي.
* ماكنتيش مقررة أنك تكوني من أوائل الثانوية ؟
** لا الصراحة هي جت كدا حتي ماكنتش مصدقة في الأول فضلت فترة عبال مااصدق شوفت صورتي حوالي 15 مرة عشان أصدق بس.
* كان رد فعلك أي لما عرفتي أنك من الأوائل ؟
** هو أنا طبعاً في الأول ما صدقتش إلا لما شوفت الصور علي الموبايل بس بعد ما صدقت كنت بصوت بقا.
* أول حد بلغك بالخبر كان مين ؟
** هو مابلغنيش أنا هما صحاب ماما أتصلوا عليها كانوا شافوها قبل ما انا أشوف المؤتمر أصلاً فقعدت أعيط لماما مفكرة أنهم أتلخبطوا في صورتي وكمان أتلخبطوا في أسمي وكنت قاعدة عادي قلقانة ومستنية النتيجة تطلع العصر بقا عادي بس كان عندي صحاب كتير بس كنا بناخدها بهزار أي يا شهد أنتي مالك أنتي كدا كدا هتطلعي مع الأوائل فكنت بضحك من باب الهزار مش أكتر.
* كان أي إحساسك أول ما شوفتي صورتك كدا مع الأوائل ؟
** كنت مبسوطة اوووي الحمدلله وحسيت بقا فعلاً أن ربنا ما بيضيعش تعب حد فعلاً واستريحت بقا لأن كان بقالنا كتير أووي تعبانيين حتي أخدنا الاجازة فرحنا شوية وبعد كدا النتيجة هتظهر نقلق تاني فكلها كانت قلق.
* ناوية تقدمي أي إن شاء الله ؟
** لسه مش عارفه هختار بقا لأن كان أهم حاجة عندي أن أنا أجيب مجموع بس كدا بقا الحمدلله أختار علي مزاجي وأنا مش مايلة لحاجة معينة كان أهم حاجة بس أن أذاكر وأجيب مجموع.
* طبعاً كلنا خلال رحلة الثانوية العامة بنكون محتاجين دعم من كل اللي حوالينا تحبي تشكري مين علي دعمهم ليكي ؟
** ماما طبعاً أول حاجة كنت أنا وماما في ثانوية عامة تقريباً حتي في الأمتحانات كانت بتيجي معايا أنا في اللجنة وهي مثلاً قاعدة مستنية برا قدام المدرسة وما بتمشيش إلا لما أخلص وتاخدني ف كدا أنا وهي خلصنا امتحانات مش أنا بس.
* دعم والدتك ليكي كان إزاي ؟
** كانت موفرة ليا كل حاجة وأي حاجة أنا عايزاها كانت تجيبها الحمدلله وعمرها ما قالتلي ذاكري لأن خلاص كانت تقولي أنتي عارفة مصلحتك وأنا تلقائي من نفسي كنت بذاكر لأن لازم يكون عندك مسؤولية يعني أهم حاجة المسؤولية يعني لو مامتك بتقولك أربعة وعشرين ساعة ذاكر وأنت ما عندكش مسؤلية لا برضوا مش هينفع وأهم حاجة تنظم وقتك.
* طب أنتي كنتي منظمة وقتك إزاي أو يومك إزاي ؟
** أهم حاجة النوم كويس طبعاً لكن في الآخر بيكون صعب النوم أصلا وكمان قبل الأمتحان بشهرين اللي هو بقا مكناش عارفين إحنا بنعمل أي وأحلي حاجة أنا وصحابي كنا بنعملها أننا كنا بنشجع بعض وكلهم جابوا مجاميع كويسة برضوا.
* هل كان عندك رهبة وخوف من الإمتحانات؟
** اه كانت عندنا طبعاً بس كنا بنهون علي بعض ونقول نذاكر دلؤاتي وكنا نقول أنها زي أي امتحانات أي سنة بس هي مش كدا.
* كان شعورك أي وأنتي نازلة الأمتحان الصبح ؟
** كنت بكون قلقانة بس أول ما أمسك ورقة الأمتحان كدا خلاص بحل عادي كل اللي أنا ذاكرته بقا أحطه في الورقة أتعب نفسي علي قد ما أقدر إن أطلع ب أقل خساير.
* بعد ما خلصت رحلة الثانوية العامة تحبي تقولي أي لكل الطلاب اللي داخلين ثانوية عامة ؟
** ربنا معاكم طبعاً بس أهم حاجة أن يكون عندك مسؤولية وتحاول تنظم وقتك علي قد ما تقدر يعني تذاكر برضوا علي قد ما تقدر ماتسيبش حاجة تندم عليها بعد كدا تقول عليها كان ممكن أعمل أكتر كان ممكن أذاكر أكتر كدا كدا ربنا ما بيضيعش تعب حد سواء جبت مجموع أو ما جبتش أهم حاجة من جواك تكون عارف أنك أنت عملت اللي عليك وتكون واخد بالأسباب وكل حاجة بس والنتيجة دي بقا بتاعت ربنا أن شاء الله وما تبدأش جد أووي عشان ما تجيش في الآخر تمل أو تزهق وذاكر أول بأول ما تراكمش حاجة عليك ومش أهم حاجة أنك تاخد في المادة الواحدة 3 دروس مع تلت مدرسين أهم حاجة أنت ومدرس واحد يكون كويس وطبعاً المدرسين ليهم فضل جامد جدا بس أهم حاجة أنت اللي تكون كويس ومدرس واحد تكون أنت مقتنع بيه.
* شهد من أوائل الثانوية العامة كانت بتاخد في المادة الواحدة كام درس؟
** كنت باخد المادة عند مدرس واحد المادة ليها درس واحد لأن لازم يكون عندي وقت في البيت برضوا لازم أسستم نفسى علي عدد ساعات معينة اللي هاكون فيها برا اللي هو مش طول الصبح برا عشان بياخد دروس هيجي تعبان فمش هيعرف يذاكر كلة متعلق ببعض.