ــــــ
شعر : لمياء حمدي
ــــــ
كان أقوى شيء
قاله الزمن ..
عن قلب لازم ينفطم
بص الحنين ساعة الفراق
قال للقليب إرضي الحَزَن
إرضي اللي طول عمره اتحكم
بين مستحيل رافض يكون
وبين صعب طال بيه الأجل
إحفظ مقامك يا شجن
عايش تملي في الضلوع
رافض تسلّم للأمل
خاصمت ميت مليون أمل
وصاحبت ميت مليون ألم
………….
لحظة عتاب …
جابت لها الف كفن
مالهاش لا لون ولا محتوى
كانت له تحت المستوى
وكان ليها قلب بينتحر
صوتها اللي راح ويّا البكا
وكأنه ناي رافض يموت
هوّ اللي راح ويّا العهود
ح يجي له يوم ممكن يعود
لمي دموعك وابعدي
طريقه لسه ح يبتدي
وتنسي اللي كان واللي حصل
قلب الجديدة خلاص وصل
جابت له ميت مليون عهود
يمكن يحن … يمكن يعود
لكن قلبه كان حجر
ساب قلبها … راح انتحر
…………..
هو بقى ….
كانت شموعه بتتولد
عرف السعادة من جديد
حس الربيع جدد عهوده بالطلوع
من مشرق الشمس ف عيونها
وغروب شتا ويّا البكا
عاش رتم مركون في الروتين
في مكتب القلب القديم
على رف كان بيضمها
هي وحكاوي قلبها
عاش الملل جوة ضلوعه منها
جدّد حياته بالحكاوي المغرمة
بكل كلمة ملهمة
تلهب حماس الروح أكيد
وماله بقى …
يتمعشق ف قلوب الصبايا
يكتب بميت مليون دواية
والف لون جوة الغرام
فصّل اتواب الحرام ولبسّه
وكأنه توب ناعم أوي في ملمسه
عاشق عيونها وقدّها
ودي مين يا قلبي قدها …
اه من رموشها وسحرها …
صالت وجالت في المدى
عملت دواير زوبعة
فانهار نهار كانت شموسه منورة
وولعت له نار اكلت حياته كلها
……………
كاس المرار داير هنا
يوم يشتهيك ويوم لغيرك
بلاش تعيش وهم ف مفيش
دي الدنيا ح تلف وتجي لك
اسم الوداد والحب كان زي العسل
بس اللي راح من عمرها
لابد يوم يرجع يصيبك
قلب الصبايا مش لِعَب
مركونة فوق رف المباح
قلب الصبايا جوهرة
لازم تصونها عشان تصونك
ــــ