كتبت : آية كمال
مأساة حقيقية يعيشها مستأجري محلات المحطة بنفق أحمد عرابي بعدما ألتهمت النيران بضائعهم من ملابس و أحذية و أدوات تجميل ، وإندلع حريق هائل بنفق أحمد عرابي بمحطة الزقازيق وإلتهمت النيران ما يقرب من 23 محل تجاري حيث بدأ الحريق بإحدي المحلات ثم امتد الي البقية .
وكشف مصدر أمني ل ” عيون الشرقية الآن ” عن الخسائر الباهظة التي تسبب بها الحريق ، والذي أسفر عن إصابة بعض أصحاب المحلات بحروق متفرقة بالجسم و أخرى بحالة إنهيار تام و أخري بفقد النطق و حتي الآن لم تتحسن حالتهم.
ويقول سمير علي أحد المستاجرين : عايشين علي المحطة من سنين بناكل عيش و بناكل عيالنا حلال يوم الحريق قام شخص مجهول بجمع أكوام من القمامة و قام بإشعال النيران بها خلف المحلات و بعدها النار مسكت في بضائعنا من الخلف و لقينا النار داخلة علينا .. إحنا معانا عيال و جايبين فلوس من البنوك و محدش بيرحم حد .
و يضيف عادل أحمد مستأجر ، أن الحريق إشتعل الساعة 5 مكناش شغلنا الكهرباء لأننا بندفع عليها فواتير غالية و يد خفية وراء ما حدث .
و تقول سهير عطية صاحبة أول محل إشتعل به النار
ليا أول محل فية ما يقارب 500 ألف جنيه بضاعة ملحقتش أخد حاجة حتي فلوسي أكلتها النار مقدرناش علي الولعة بالطفايات وخراطيم المياه بينا و بين المطافي 10 دقائق و بلغنا و محدش سأل فينا غير بعد ما كل حاجة إنتهت وأنا ست و معايا 4 بنات بصرف عليهم بنفسي هأكلهم منين و المحل دا كان مصدر رزقي الوحيد.
و يقول أحمد حسن تاجر صعيد أحد المستاجرين
أسفر الحريق عن خسائر مادية كبيرة بحوالي 10 مليون جنية و جميعها بالأجل من التجار و بنسدد في موسم رمضان و العيد و محدش من النواب سأل فينا ولا حد حاول يجبر بخاطرنا و المحلات ملهاش تأمين بيوتنا اتخربت و ساكنين بالإيجار ياريت النار كانت خدتنا إحنا و سابت البضائع لعيالنا يسترزقوا منها أفضل ما يتشردو.
مستأجري محال نفق أحمد عرابي يستغيثون بمحافظ الشرقية دكتور ممدوح غراب بسرعة النظر لهم بعين الرحمة تحت مقولة إحنا مش عارفين مصيرنا إيه و مش لاقين حد يوجهنا لأي شئ و بنترجي المسئولين ينظرو لينا بعين الرأفة.