لشعراء العامية على وجه الخصوص ، وكل الشعراء على وجه العموم ..
ــــ
وطوف عادي
في أصوات اللي فاتوا
واختلف عنهم ..
ما تتمسحش في هدومهم
ولا تسرقشي من ( بيرم
ولا حداد .) .
ولا تكونشي ( جاهين ) تاني
ولا ( أبنودي أو حجاج )
ولا تلبس عباية ( نجم
أو رضوان ) ولا ( ناصر )
ولا تبقى ( أبو مصيلحي )
وخليك يا ولد نفسك
تكون شاعر .. أصيل مطبوع
عطوف القلب
والإحساس
وقاري الناس تقول عنهم
وعايش كل أحوالهم
وعلمهم وفهمهم
ونوَّرهم ..
ماهو انت رسول بدون الوحي
ودي رسالتك
هتسأل عنها يوم الحشر
فكون إنسان خلوق الطبع
ما تكونشي في يوم هدَّام
ولا نمَّام
ولا شجره بتطرح غِل
كون الفل ..
واهدي الحب للدنيا
وعيش يومك مع الأنوار
مع الصحبه اللي ما تخرب ..
وبتعمَّر ..
وإزرع كلمتك نخله..
تعيش بعدك تصد الريح
وياكل من رطبها الغير
وزمنك يبقى ليك عاشق
ومنقوش في القلوب رسمك
ومعروف للحصى اسمك
وقول ما تخفشي جلادك
وسجانك .. !!
كده يابني تكون شاعر
تعيش شاعر ..
نبي قوَّال بدون الوحي
مش عادي
تموت شاعر