برغم كل البعد ساكن جوَّه جلبي ..
جلبي زاد للعاشجين
جول وفضفض يا صديقي
كل جولك تمر حنه وعود ريحان
كل جولك مستكه على حبهان
جول وخللي الصبح فضه
والنهار يملا الغيطان
جول يا ( عبده ) ..
أوعي تخشي أي جوه ..
من غشيم ..
أو من فتوه
إنت أجوي .. ..
جوتك من فيض ربك
يا ( نبي ) وحيك في شعرك
خللي منه صباح جميل
يحضن عيونا .
خللي منه نهار أصيل
يحضن زمانا
خللي منه أحلى جمره
في سمانا .. تشتهينا
خللي منه نجوم بتضحك
ترسم الأحلام خطاوي
يا ( جوي ) خليك مع صاحبي ..
اللي جلبه ..
زي لون ( البافته ) وابيض ..
من قلوب صبح العيال
شوفت ضل خطاوي جنبي
ماشيه ترميني بسهام
بس إنت خطوتك في النور ( مجام )
شوفت جنبي تعلبه وديبه وغيام
والوشوش متلونه على كل لون
نفسي لون الحب يبقى فيها سايد
زي لون وشك وجلبك
من طيابة ( النيل ) حلاوتك
شهد في الكلمة تجولها
بلسمه تشفي القلوب
الجنوب لساهو بكر
لساهو فيه ( عبد الجوي )
لسه فيه شجر اللمون والبرتقان
والفراوله والعنب
لسه فيه ريحة ( محمد ) و ( المسيح )
لسه فيه نوَّار بلدنا الطيبة
( مصر ) يا ست البنات
متخافيش ..
طول مافي عيونك رجال
سهرانين .. بتقول بلدنا
سهرانين .. يفرشوا السكه لولادنا
نور وأحلام وانتصار
أوعي ينشف حرف جولك يا ( محمد )
جول وفضفض يا صديقي
م الحروف يطلع نهار
شعر / نبيل مصيلحي