الرئيسيةأخبار -المديرياتالأولى أدبي على مستوى الجمهورية بالثانوية الأزهرية : العزيمة والأمل سببا تفوقي.. وفقدان البصر أثر إيجابيا.. وسعيدة بمنح شيخ الأزهر رحلة حج لوالدي
الأولى أدبي على مستوى الجمهورية بالثانوية الأزهرية : العزيمة والأمل سببا تفوقي.. وفقدان البصر أثر إيجابيا.. وسعيدة بمنح شيخ الأزهر رحلة حج لوالدي
جلست في غرفتها بمفردها تترقب إعلان نتيجة الثانوية الأزهرية، طامحة بأن تحصل على أحد المراكز العشرة الأول على مستوى الجمهورية، آملة في تلقيها اتصال من فضيلة الإمام الأكبر أحمد الطيب شيخ الأزهر.
هكذا بدأت أمل محمد أحمد عبدالغفار، بنت قرية الروضة التابعة لمركز فاقوس بمحافظة الشرقية، والحاصلة على مجموع 583 بنسبة مئوية 92.54، والحاصلة على المركز الأول أدبي للثانوية الأزهرية للمكفوفين.«عيون الشرقية الان»أجرت حوار مع الطالبة للتعرف أكثر على الأسباب التي أههلتها للحصول على المركز الأول، فإلى نص الحوار:
1-كيف استقبلتين خبر حصولك علي المركز الأول علي مستوي الجمهوريه؟ _ أولا فضيلة شيخ الأزهر اتصل بينا ووالدتي ردت عليه وقتها كنت قاعدة في غرفتي على أعصابي ودخلت والدتي أخبرتني بأن شيخ الازهر عايز يكلمك ويباركلك، أنا في الاول صراحه مكنتش مصدقه وكنت غير مستوعبة اللي بيحصل بس كان عشمي في ربنا كبير والحمد لله كلنا كنا سعداء.
2-هل كنتي تتوقعين حصولك علي المركز الاول؟ _ أولا الحمد لله.. بس المركز الاول نفسه مكنتش اتوقع؛ ولكن كنت أتوقع أني هكون من الاوائل ولله الحمد وصلت للي نفسي احققه.
3- هل كان أحد يساعدك في المذاكره؟ _ أكيد طبعا اخواتي كانوا دايما بيسجلولي ويسهروا معايا طول الليل ويساعدوني دايما، وأخي الأصغر في الصف الثاني الثانوي وشقيقتي الكبرى بالمرحلة الثانية من الجامعة.
4- ما هي طرق المذاكرة التي كنتي تتبعينها يوميا؟ _ أغلب طرق المذاكرة كانت عن طريق التسجيلات أو أشقائي كانوا بيذاكرولي ويعيدولي مرارا وتكرارا لحد ما اكون فهمتها.
5-كم عدد الساعات التي كنتي تذاكرينها يوميا؟ _ ليس لدي عدد محدد محدد ؛ لأنني كنت بانتهي من دروسي الساعة 2 الظهر وكنت ببدأ مذاكرة حتى ساعات متأخرة من الليل وكان في الاغلب من 5 إلى 6 ساعات وده كان بسبب تعب الدروس الخارجية.
6- ما هو طموحك في المستقبل؟ وما هي الجامعة التي تتمنين أن تلحقي بها؟ _ نفسي أكمل درسات عليا بعد الكلية وأكون دكتورة في الجامعة، وأنا أفضل أن التحق بكلية سهلة واحقق فيها النجاح بسهولة؛ مش مهم أن الواحد يدخل كلية قمة مناسبة لمجموعة ؛ الأهم انه يدخل كلية هو حاببها يحقق فيها كل اللي عايزة، أنا بحب جدا المواد الشرعية ونفسي أكمل دراستي في المواد الشرعية، وأتمنى أن يكون ليا منحة ؛ ولو مش كده أقرب جامعة ليا هي جامعة القرين عشان قريبة مني ومش اتعب في السفر كل يوم.
7-كيف تغلبتين علي عجز فقدان البصر؟ _ الحمد لله أنا كنت بروح الدروس عادي في مجموعات وبعد كدا كنت بأروح البيت وأخواتي بيسجلولي ؛ وفقدان البصر مكنش عجز عندي بل بالعكس كان بيديني إني أذاكر أكتر واتفوق اكتر وربنا لما بياخد حاجه بيعوضني بحاجات تانيه أحسن والحمد لله طبعا علي كل حال.
8-هل كنتي تحصلين علي دروس خصوصية.؟ _ لا طبعا..مبحبش الدروس الخصوصية كنت دايما دروسي كلها في مجموعات ومنها بعرف مستوايا.
9- هل كنتي تذهبين إلى المعهد أثناء الدراسة؟ _ لا مكنش فيه وقت ؛ كانت الدروس والمذاكرة واخدة كل وقتي كان ممكن اروحه يوم او اتنين في الاسبوع.
10- هل ترين أن للمعهد فضل لحصولك علي المركز الأول؟ _ أكيد طبعا.. المدرسين وقفوا جنبي وساعدوني كتير وكانوا دايما بيشجعوني وبيدوني أمل وعزيمة ومكنتش بحس ابدا اني كفيفه. 11-ما هي المشاكل التي كانت تواجهك في الثانويه الأزهريه؟ _ أحيانا مكنتش بلاقي حد يذاكر معايا اخواتي كانوا بينشغلوا أيضا في مذاكرتهم وكنت بروح دروس خارجية لوحدي فكنت بتعب في المواصلات .
12- هل نظام البوكلت الذي طبق عليكم هذا العام كان مناسب؟ _ هو في مميزات وعيوب بس كانت مميزاته اكتر من عيوبه ؛ كانت اجاباته محددة في الورقة نفسها مش هنخاف من المصحح ميلاقيش اسئلتنا وكانت عيوبه انه صعب.
13- إلي من تنسبين هذا النجاح بعد الله عز وجل ؟ _ اكيد طبعا لوالدي ووالدتي واخواتي لانهم تعبوا معايا كتير والمدرسين اللي وقفوا معايا طبعا.
14-كم تحفظين من القرآن الكريم..؟ _ لله الحمد أحفظ القرآن كاملا من شيوخ الكتاب ومن المعهد الحمد لله.
15- ما رأيك في قرارات شيخ الأزهر اتجاهك ومنح والديكي رحلة حج؟ _ بصراحه مكنتش متوقعة أن دا يحصل الحمد لله منح والديا رحلة حج وده يمكن يكون جزء بسيط جدا برده لوالديا علي تعبهم معايا، وده كان قرار محصلش السنوات اللي فاتت وكمان مبسوطه جدا من قراره إعفائنا من مصاريف الجامعة والمكافئات المالية التي سنحصل عليها؛ ومن كتر فرحتي انا مش مصدقه ده الله يباركله.