كتبت – نوران عسكورة
كشفت الفنانة هاجر أحمد عن دورها في مسلسل “المعلم” الذي تشارك به في السباق الرمضاني 2024، ووصفت “المعلمة دهب” أنه تحدي كبير بالنسبة لها مؤكدة أنها حاولت عدم تقليد أي من شخصيات المعلمات التي تم تقديمها في السينما والدراما التليفزيونية.
وقالت هاجر أحمد: “الدور تحدي كبير وقلقت لما جالي وسألتهم اختارتوني على أي أساس وشايفين فيا إيه إني أعمله، ودي كانت أمنية حياتي أني أعمل حاجة مختلفة وأشوف قدراتي، ولولا تشجيع أستاذ مصطفى شعبان وكل الموجودين مكنتش عملته”.
وتابعت هاجر: “هي بنت شابة صغيرة وفيها خط درامي رومانسي وفيها جدعنة، وعندها صرعات كتير مع أخوها بيقدم دوره أسامة الهادي ووالدها أستاذ أحمد فؤاد سليم، واللي فكرت فيه إني مش عايزة أقلد ولا أشوف حد قدم شخصية المعلمة إزاي وأقدمه بطريقتي أنا”.
وأضافت متحدثه عن أصعب المشاهد في مسلسل “المعلم”: “المشاهد اللي فيها خناق وبعلي صوتي، أنا قدمت الشخصية بدم خفيف”.
كما تحدثت هاجر أحمد عن كواليس المسلسل ووصفتها بالرائعة قائلة: “مصطفى شعبان شخص هادي جدًا وطول الوقت بيضحك وبيهزر مفتكرش إني شفته مرة اتضايق من حاجة”.
واختتمت هاجر: “طول الوقت مصطفى شعبان مجمع الناس كلها حواليه وبيأكلهم ويشربهم، بيعمل القهوة بإيده في البيت ويجيبها معاه ويديهالنا، متمنية أن تتلقى ردود فعل جيدة من الجمهور”.