الشاعره / ندى الدهشوري
يابااااااااااااا ياباااا
ليه سبتني وفارقت يابا
ليه ضهري انكسر في غيابك
ليه عيوني موقفتش دموع على فراقك
ليه مش قادره استوعب فراقك؟
!!!انت موجود ….. صح
!ولا انا خلاص بقيت عايشه على ذكرياتك
مين اللي هصحى كل يوم على صوته بيناديني
مين اللي هيقولي اجري يا غلباويه ياللي طلعتي عيني
مين اللي هتشعبط في كتفه وضحكتي تبقى ماليه عيني
مين اللي هترمي في حضنه لما الدنيا تضيق في عيني
مين اللي هيخبيني من عيون الناس
مين اللي لما أنجح هيفرح ويحسلي نفس الاحساس
مين اللي هيحط التاج على طرحتي ويقولي مبارك يا أجمل إحساس
مين اللي هيمسك إيدي ويسلمني لعريسي قدام الناس
فارقت يابا وسايبني تايهه ومش عارفه أداوي الإحساس.
!خلاص مبقاش ليا سند اتحامى فيه قدام الناس
خلاص انكسرت!!!!
يعني خلاص هي كدا خلصت
يااااه موجوعة اوى ياباا.
وللأسف لو هتجيلي الدنيا كلها في كفه محدش هيداوي وجعي.
محدش هيبقى زيك ويخاف عليا وعلى قلبي.
عُمر صورتك ما هتفارق خيالي.
عُمر حالي ما هيبقى هو حالي.
عمري ما هنسى كلامك اللي كنت بتقولهولي وانت مفارق أعتابي.
فارق أنت وارتاح يا غالي.
متخافش اسمك هيفضل محفور في قلبي ودايم على لساني.
متخافش بنتك اللي ربتها عايشة عشان ترفع اسمك دايما في العالي.
يكفي كلام الناس وهما بيقولولي تسلم تربيتك يا غالي يا بنت الغالي.