مش ناقصه صداع
ولا كوم أوجاع
يتحط ف قلبي المتقطع
علي ناس بتموت
وتابوت بيفوت
علي اهل النجع اللي ما لاقي
غير ذل الجوع
ودموع بتعافر ع الخدين
مش شايفه طريق الفرح منين
وانين مفروش
ف طريق الخوف
وف جوف الليل اللي بيختار
لينا الموضوع
ويطفي شموع
مش لاقيه مكان وسط الأحزان
وليلاتي تبات
وف عينها دموع
على ناس
مش لاقيه لبيتها أساس
ولا لاقيه حيطان
تحمي الموجوع
من تُقل الهَم اللي ما يتلم
وطريق المُر اللي ما تعرفش
حاراته رجوع
مش ناقصه صداع
ولا حتي ضياع
ولا ناقصه
الخطوه تسوقنا ف يوم
لطريق ممنوع
وان كان ولابد
نُحصر ونعد
أيام الغم المتنطور
ف طريقنا السد
فحذارى تلوم على حرف كتوم
ف ديوان مكلوم
فوق رف الصمت اللي ما هموش
أصل الموضوع
لو قال الحق
أو كان عنوانه الصارخ… لأ
وحذارى تلوم
على شاعر صوته اليوم مسموع
لو قال للناس
ان اللي انداس
انداس علشان مش لاقى أمان
ف زمان هلكان
فيه الإنسان عايش مخدوع