كتبت – آلاء رضا
كشفت الفنانة سمية الخشاب، عن سبب نجاح أي عمل تقدمه أو تشارك فيه، مشيرة إلى أنها لا تحب التكرار والظهور بلا فائدة.
وقالت سمية الخشاب: “نجاحي جاء بعد مجهود سنين طويلة وتاريخ وسنين من التعب أنك تبني اسمك وتعمل جمهور، وأعمال كتير مميزة وناجحة مع منتجين ومخرجين عارفين يعني إيه يصنعوا نجم”.
وعن نجاح مسلسل ريا وسكينة لحد الآن بعد 18 سنة من عرضه اتفاجأت انه طلع تريند تاني شهر كامل على السوشيال ميديا.
ويُعد المسلسل من إنتاج العدل الجروب واللي هي شركة هايلة وكبيرة وناس محترمين وهما سبب من أسباب صنع نجومية سمية الخشاب، ولهم فضل كبير عليا من أول ريا وسكينة ومسلسل ولقاء على الهواء.
وأوضحت سمية الخشاب في لقاء تلفزيوني: “أنا كسولة جدًا، لكن عندي ميزة أشكر ربنا عليها إني لو غبت سنين وطلعت بحاجة بتعمل نجاح كبير، والسر بعد ربنا إني مش محروقة، ومش شغالة عمال على بطال والناس شايفاني ليل ونهار وزهقت من شكلي، ولما تختفي وترجع مرة واحدة بيبقى لك طلة وحشة”.
وأكدت سمية الخشاب أنها لا تعتبر الفن مهنة بالنسبة لها ولكن تتخذها هواية قائلة: الفن بالنسبة لي هواية بحبها، لو مهنة كنت هعتمد عليها واضطر أشتغل أي حاجة علشان أبقى موجودة وانتشر ويبقى عندي مصدر دخل.
وأضافت: “الناس تقول عني غايبة أحسن من إنهم يقولوا محروقة، أو اشتغل أعمال لا تنجح، ولكن لما أغيب وأرجع بحاجة محترمة أنا كده بحترم جمهوري”.
واختتمت سمية الخشاب: “كل ده بيخليك تصنع تاريخ وبتعمل لنفسك اسم، والعمل الجيد بيفرض نفسه لأنه مجهود سنين وشقى علشان تصنع اسم وما تكونش متسرع وما تعملش أعمال شبه بعضها وحاجات كتير صعبة وربنا بيوفق أنت بتصنع اسم انت والشركة اللي بتنتج لك وبتخليك تحافظ على المستوى، ومخك وذكاءك بيحطوك في حتة حلوة”.
وكشفت سمية الخشاب أنها تستعد لإحياء حفلات غنائية مجددًا بعد فترة غياب عقب طرحها كليب أغنيتها اركب على الموجة، قائلة بالتأكيد إن شاء الله هنزل حفلات لايف، وده هدفي في الفترة المقبلة، وأنا عملت حفلات في ألبومي الأول، وبعدها توقفت لأن التمثيل أخذني، ودايما كان في صراع بين التمثيل والغناء.